Այց առողջարանային ճամբար

ՀՀ առողջապահության նախարար Դերենիկ Դումանյանը ՀՀ աշխատանքի և սոցիալական հարցերի նախարար Արտեմ Ասատրյանի հետ երեկ երեկոյան այցելել է «Արաբկիր» բժշկական համալիր-երեխաների և դեռահասների առողջության ինստիտուտի Ապարանի ամառային առողջարանային ճամբար։

Արդեն հինգերորդ տարին է այստեղ կազմակերպվում է առողջական տարբեր խնդիրներ ունեցող 7-14 տարեկան 120 երեխայի ամառային երկշաբաթյա հանգիստը՝ ՀՀ առողջապահության նախարարության կողմից, պետական պատվերի շրջանակներում։ Orange հիմնադրամի աջակցությամբ այս էլ երրորդ ամառն է ճամբարում իրենց երեխաների հետ անվճար են ապրում ԱրԲեՍ ցերեկային բուժման կենտրոնի և դրա մարզային վերականգնողական մասնաճյուղերի խնամքի տակ գտնվող աուտիզմով 20 երեխայի ծնողները ևս։

Ազգային ժողովի առողջապահության, մայրության և մանկության հարցերի մշտական հանձնաժողովի նախագահ,«Արաբկիր» բժշկական համալիր-երեխաների և դեռահասների առողջության ինստիտուտի գիտական ղեկավար Արա Բաբլոյանը նախարարներին ծանոթացրել է երեխաների բուժման, հանգստի և ժամանցի համար ստեղծված անհրաժեշտ պայմաններին։

Առողջարանային այս ճամբարում աուտիզմ, էպիլեպսիա, պարբերական և այլ հիվանդություններ ունեցող երեխաները բուժմանը զուգընթաց խաղերի, հետաքրքիր ժամանցի և հասակակիցների հետ շփման արդյունքում ոչ միայն ֆիզիկապես են ամոքվում ու հանգստանում, այլև հոգեպես:

Բժշկի, խնամակալների և հատուկ մանկավարժների շուրջօրյա հսկողությունը, ինչպես նաև գեղատեսիլ բնությունն ու կենարար օդը նկատելի արդյունքներ են տալիս, նպաստում խնդիրներ ունեցող երեխաների միմյանց հետ անկաշկանդ շփումներին։

Հարցեր, պատասխաններ, մեկնաբանություններ